கை அமைதிகள் - 6: கடி ஹஸ்தமும், ஊரு ஹஸ்தமும்

அமைதி

• உடல் பக்கத்தில் தொங்கும் கை, இடுப்பில் படிந்திருக்கும் அமைதி கடி ஹஸ்தம். கடி (कटि) = இடுப்பு
• உடல் பக்கத்தில் தொங்கும் கை, தொடையில் படிந்திருக்கும் அமைதி ஊரு ஹஸ்தம். ஊரு = தொடை

• கட்டை விரல் மற்ற விரல்களில் இருந்து விலகி பிகுவாக இடுப்பில் / தொடையில் ஊன்றியிருக்கும்,
• மற்ற விரல்களும் உள்ளங்கையையும் இடுப்பில் / தொடையில் படிந்திருக்கும்.
• நடு விரலும் மோதிர விரலும் உடலில் நன்கு படிந்திருக்கும். சுட்டு விரலும் சிறு விரலும் உடலில் இருந்து சற்று விலகி இருக்கும்.

• கடி ஹஸ்தத்தில் முழங்கை சற்று வளைந்திருக்கும். ஊரு ஹஸ்தத்தில் முழங்கை நீண்டிருக்கும்.
• கடி ஹஸ்தத்தில் கட்டை விரல் தவிர்த்த மற்ற விரல்கள் சற்று மேல் நோக்கி இருக்கும். ஊரு ஹஸ்தத்தில் கட்டை விரல் தவிர்த்த மற்ற விரல்கள் தரைக்கு சம மட்டத்தில் இருக்கும்.

கடி ஹஸ்தம்  -  ஊரு ஹஸ்தம்

மாற்றுப் பெயர்கள்

• ஊரு ஹஸ்தம் - கடியவலம்பிதம் (कट्यवलम्बितहस्त) என்றும் அழைக்கப்படும். இடுப்புக்கு கீழ் தொங்கி அமையும் கை அமைதி ஆதலால் இப்பெயர்,
• கடி ஹஸ்தம், கடிக ஹஸ்தம் என்றும் அழைக்கப்படும்.

குறிப்பு

இந்த ஹஸ்தங்கள் இலகுவான நிலையையும் தன்னம்பிக்கையையும் காட்டுகின்றன.

படிமங்கள்

• கடி ஹஸ்தம் துர்க்கை, பிரம்மா முதலிய பல படிமங்களில் காணப்படும்.
• ஊரு ஹஸ்தம் சிறப்பாக திருமால், முருகர் படிமங்களில் காணப்படும்.

கடி ஹஸ்தம் - இடது முன் கை
துர்க்கை, சென்னை அருங்காட்சியகம்

ஊரு ஹஸ்தம் - இடது முன் கை
நான்முகன், அபிமுகுந்தேஸ்வரர் கோயில், கும்பகோணம்

கடி ஹஸ்தம் - இடது முன் கை
நான்முகன் சிவபுரம்

ஊரு ஹஸ்தம் - இடது முன் கை
ஹரிஹரர், ஆவுடையார்கோயில்

நடைமுறையில் கடி ஹஸ்தம், ஊரு ஹஸ்தம் இரண்டையும் வேறுபடுத்துவது கடினமாயிருக்கலாம். இரண்டையும் 'கடியவிலம்பிதம்' என்று கூறுவதும் உண்டு. 

நன்றிக்கடன்

• கணபதி ஸ்தபதி; சிற்பச் செந்நூல்; தொழில் நுட்பக் கல்விக் கழகம்; மூன்றாம் வெளியீடு; 2001
• Gopinatha Rao, T. A.; Elements of hindu iconography; Motilal Banarasidas Publishers Pvt Ltd; 1914 Reprint 1997.
• South Indian images of Gods and Godesses; Krishna Sastri. H; Madras Governement Press; 1916
• https://www.wisdomlib.org
• மா மாரிராஜன்; சிற்ப இலக்கணத் தொடர்; மெய் எழுத்து.
• BHU Swayam - Iconography of Major Hindu Deities