கை அமைதிகள்- -11: கர்த்தரி முக, முஷ்டி ஹஸ்தங்கள்

ஆயுதங்களை ஏந்தும் ஹஸ்தங்களை கருவி ஹஸ்தங்கள் எனலாம்.  ஏழு கருவி ஹஸ்தங்களுள் நான்கு ஒரு வகை ஆயுதத்தை மட்டும் ஏந்துபவை. சிகர ஹஸ்தமும், தனுர் ஹஸ்தமும் வில்லை மட்டும் ஏந்துவன. டமரு ஹஸ்தம் டமருவையும், அர்த்த சந்திர ஹஸ்தம் தீயையும் நடராஜர் படிமங்களில் ஏந்துபவை. அவ்வாறின்றி பல்வகை ஆயுதங்களையும் ஏந்தும் கருவி ஹஸ்தங்கள் மூன்று: கடகம், கர்த்தரி முகம், முஷ்டி. கடக ஹஸ்தம் அதனுடன் மிக நெருங்கிய கருத்து ஹஸ்தமான சிம்மகர்ண ஹஸ்தத்துடன் சேர்த்து வேறொரு பதிவில் விவரிக்கப்பட்டுள்ளது. இங்கு கர்த்தரி முகமும், முஷ்டியும்.

கர்த்தரி முக ஹஸ்தம்

அமைதி

• கையிலிருந்து நடு விரலும், சுட்டுவிரலும் நீண்டிருக்கும். 
• நடு விரல் சற்று முன்னோக்கியும், சுட்டு விரல் சற்று பின்னோக்கியும் கத்தரி போன்று அமையும்.
• அணிவிரலும், பெரு விரலும் வளைந்து உள்ளங்கையில் நெருங்கி அமையும். 
• சிறு விரல் சிறிது வளைந்து இருக்கும். 
• மேற்கைகளில் மேல் நோக்கி அமையும்.

கர்த்தரி முக ஹஸ்தம்

கருத்து

கர்த்தரி  = கத்தரி.

இது ஆயுதங்கள் ஏந்தும் ஒரு கருவி ஹஸ்தம்.

படிமங்கள்

திருமால், சிவன், பிரம்மா, துர்க்கை, முருகர் முதலிய பல தெய்வங்களின் சக்கரம், சங்கு, மழு, மான், அக்க மாலை, கமண்டலம், சக்தி ஆயுதம், வஜ்ராயுதம் போன்ற ஆயுதங்களை ஏந்துவதாக கர்த்தரி முக ஹஸ்தம் உள்ளது.

கர்த்தரிமுக ஹஸ்தம்
துர்க்கை, கடாரம்கொண்டான், மயிலாடுதுறை மாவட்டம்
சென்னை அருங்காட்சியகம்

கர்த்தரி முக ஹஸ்தத்தில் சக்கரமும் சங்கும்
திருமால் - அரிஞ்சய சோளீஸ்வரம், மேல்பாடி

1. இந்த கர்த்தரிமுக ஹஸ்தத்தில் சிறு விரல் செங்குத்தாக நீண்டுள்ளது காண்க. 2. சக்கரம் பக்கவாட்டில் உள்ளது. எறியப்படுவதற்கு ஆயத்தமாக உள்ளதால் இது 'பிரயோக சக்கரம்' எனப்படும்.  இவ்வாறு ஆயுதம் பக்கவாடில் பிரயோக நிலையில் உள்ள நிலை  'பிரயோக முத்திரை' இல் உள்ளது எனப்படும்

ரிஷபாந்திக சிவன்
இரு பின் கைகளில் கர்த்தரி முக ஹஸ்தம் - மழு, மான் ஏந்தி
(முன் வலதுகை - பல்லவ ஹஸ்தம்; முன் இடது கை - ஊரு ஹஸ்தம்)
ஆவுடையார் கோயில்

நான்முகன் 
வலது மேல் கை கர்த்தரி முக ஹஸ்தத்தில் அக்க மாலை
இடது கை க உடைந்துள்ளது
அரிஞ்சய சோழீஸ்வரம், மேல்பாடி

முருகன்
வலது மேல் கை கர்த்தரி முக ஹஸ்தத்தில் சக்தி ஆயுதம்
இடது கை கர்த்தரி முக ஹஸ்தத்தில் வஜ்ராயுதம் மறைந்துள்ளது
ஆவுடையார்கோயில்

(கர்த்தரி முக ஹஸ்தத்தில் சிறு விரல் செங்குத்தாக இருக்க, அணி விரல் நுனியும், பெருவிரல் நுனியும் தொட்டுக்கொண்டிருந்தால், அந்த அமைதி மயூர ஹஸ்தம்' எனப்படும்.

வேறுபாடு - ஹரிணி முத்திரை*

சிறுவிரல் வளைந்து இருப்பதற்கு பதிலாக செங்குத்தாக நிமிர்ந்து இருக்க பெருவிரலும் மோதிர விரலும் தொட்டுக் கொண்டிருந்தால் அது  ஹரிணி முத்திரை எனப்படும். ஹரிணி= மான்.

ஹரிணி ஹஸ்தம்
(நன்றி: BHU Swayam - Iconography of Major Hindu Deities)

முஷ்டி ஹஸ்தம்

அமைதி

• கட்டை விரல் தவிர்த்த மற்ற நான்கு விரல்களை மடக்கி
• உள்ளங்கையோடு சேர்த்து இறுக்கிப் பிடித்து
• கட்டை விரலை நடு விரல் மீது பொருத்திய அமைதி.

முஷ்டி ஹஸ்தம்

குறிப்பு

• இது ஒரு கருவி ஒற்றைக் கை அமைதி.
• வாள், தண்டம், கேடயம் முதலியவற்றை இறுக பிடிக்கும் ஹஸ்தம்.

முஷ்டி ஹஸ்தம் 
பைரவர், சோமேஸ்வரர் கோயில், ஹலசூரு, பெங்களூரு

முஷ்டி ஹஸ்தங்கள் 
வீரபத்திரர், சோமேஸ்வரர் கோயில், ஹலசூரு, பெங்களூரு

முஷ்டி ஹஸ்தம்
பைரவர், செய்யாறு வேதபுரீஸ்வரர் கோயில்

முஷ்டி ஹஸ்தம்
ஆவுடையார் கோயில்

நன்றிக்கடன்

• கணபதி ஸ்தபதி; சிற்பச் செந்நூல்; தொழில் நுட்பக் கல்விக் கழகம்; மூன்றாம் வெளியீடு; 2001
• Gopinatha Rao, T. A.; Elements of hindu iconography; Motilal Banarasidas Publishers Pvt Ltd; 1914 Reprint 1997.
• South Indian images of Gods and Godesses; Krishna Sastri. H; Madras Governement Press; 1916
• மா மாரிராஜன்; சிற்ப இலக்கணத் தொடர்; மெய் எழுத்து 
• * BHU Swayam - Iconography of Major Hindu Deities